काठमाडौं: मलेसियामा जारी आइसीसी विश्व क्रिकेट लिग डिभिजन 'थ्री' प्रतियोगिताको तेस्रो खेलमा नेपालले सिंगापुरलाई १९० रनको फराकिलो अन्तरले पराजित गरेको छ । आइतबार बिहान मलेसियाको वायुमास ओभल मैदानमा टस हारेर ब्याटिङ गरेको नेपालले दिएको २६४ रनको लक्ष्य पच्छ्याएको सिंगापुर २१.४ ओभरमा अलआउट हुँदा ७३ रनमा सीमित हुन पुग्यो ।
सिंगापुरलार्इ फराकिलो हार चखाउन नेपालका लागि किशोर खेलाडी सोमपाल कामी एक्लैले ४ विकेट लिए। उनले १० ओभर बलिङ गर्दै ४१ रन खर्चेर ४ विकेट लिएन सफल भए । नेपालका लागि बसन्त रेग्मीले पनि ४ विकेट लिए।रेग्मीले ५.२ ओभर बलिङ गर्दै मात्र ६ रन खर्चेर ४ विकेट लिएका हुन् ।त्यसैगरी अमृत भट्टरार्इले ५ ओभर बलिङ गर्दै १९ रन खर्चेर २ विकेट लिए ।
सिंगापुरविरुद्द टस हारेर ब्याटिङ गरेको नेपालले पूरै ५० ओभर खेल्दै ९ विकेटको क्षतिमा २ सय ६३ रन बनाउन सफल भएको थियो ।
ज्ञानेन्द्रको सतक
बलिङमा किशोर खेलाडी सोमपाल कामी चम्किँदा ब्याटिङमा उपकप्तान ज्ञानेन्द्र मल्लले जादु देखाए । नेपालको शानदार जितको आधार उनैको सतकले तयार पारेको थियो । उत्कृष्ट पारी खेलेका उनले १२५ बलको सामना गर्दै ११४ रनको सानदार स्कोर बनाए ।
नेपालका लागि शरद भेष्वाकरले २५ रन बनाएर नेपालको स्कोर बढाउन मद्दत गरे । बसन्त रेग्मी र सागर पुनले समान २१ रन बनाए । त्यसैगरी कप्तान पारस खड्काले १४ रन बनाए। विनोद भण्डारीले ८, सोमपाल कामीले ६, शक्ति गौचनले ५ रन र अमृत भट्टराईले ६ रन बनाउन बनाए।
सिंगापुरका लागि अजमज महबुबुले ९ ओभर बलिङ गर्दै ४७ रन खर्चेर ४ विकेट लिए। यस्तै मुलेवा धर्मिचन्दले १० ओभर बलिङ गर्दै ३१ रन खर्चेर ३ विकेट लिए। त्यसैगरी अनिश पारमले १० ओभर बलिङ गर्दै ६६ रन खर्चिदै २ विकेट लिए।
पहिलो खेलमा युगान्डासँग २० रनले हारेको नेपालले दोस्रो खेलमा बर्मुडालाई ८ विकेटले पराजित गरेको थियो। सिंगापुरबिरुद्द जित निकालेपछि नेपाललार्इ अघि बढ्न सहज भएको छ । ६ देश सहभागी डिभिजन ‘थ्री'बाट शीर्ष दुई टोली डिभिजन 'टु'मा पुग्दा पुछारका दुई टिम डिभिजन 'फोर'मा झर्ने छन्। अब नेपालले सोमबार अमेरिकासँग र बुधबार मलेसियासँग खेल्नेछ।
annapurnapost.com
No comments:
Write comments