विश्व किर्तिमान राखेका सोमपालले दिए गर्भिलो उत्तर : मैले त पत्याईन
काठमाडौं : श्रीलंका भ्रमण राम्रो पनि रह्यो, नराम्रो पनि। व्यक्तिगत रूपमा मैले सोचेको भन्दा निकै राम्रो प्रदर्शन गर्न सकें, तर टिमले जित्न सकेन। तयारी खेल भए पनि जितको चाहना त हुन्छ नै। हङकङसँग हार्दा निकै नमिठो लाग्यो।
तीन दिवसीय खेल पहिलोपटक खेलेकाले मलाई खासै अनुभव पनि थिएन। तर जब पहिलो खेलमा आठ विकेट लिन सकें, दोस्रो खेलमा मेरो आत्मविश्वास निकै बढेको थियो।
पिच हेरेर मैले दुवै पालीमा कम्तीमा पाँच/पाँच विकेट लिन सक्छु जस्तो लागेको थियो। ब्याट्सम्यानलाई उनीहरूकै अनुकूल ठाउँमा मैले आउट गर्न सकें र १० विकेट हात पारें।
हामीले तीन दिवसीय खेल खेलेका दुबै टोलीमा श्रीलंकाको जुनियर टोलीबाट प्रतिनिधित्व गरिसकेका खेलाडी सहभागी थिए। मलाई होचो देखेर होला श्रीलंकाली खेलाडी मेरो उचाइ सोध्न आएका थिए। उनीहरूले मेरो निकै प्रशंसा पनि गरे।
हामीले टीट्वेन्टी विश्वकप खेलेको उनीहरूले पनि हेरेका रहेछन। उनीहरूले कप्तान पारस खड्का, शरद भेषावकर र ज्ञानेन्द्र दाइको पनि खुबै प्रशंसा गरे। नेपालमा क्रिकेटको पूर्वाधार, छनोट विधिबारे जिज्ञासा पनि राखेका थिए।
तीन दिवसीय खेलमा मेरो ब्याटिङ राम्रो पनि भयो। दुवै खेलमा राम्रो ब्याटिङ गर्न सकें। वर्षाका कारण हङकङसँगका अधिकांश खेल रद्द भए। लगातारको प्रतीक्षापछि सम्भव भएको एकमात्र टीट्वेन्टी खेलमा भने टोलीको ब्याटिङ चल्न सकेन। पहिला ब्याटिङ गर्ने क्रममा हामीले २५ रन जोड्दा आठ विकेट गुमाइसकेका थियौं। टोलीका सबै सदस्य चिन्तित थियौं।
यस्तो अप्ठ्यारो स्थितिमा म १० औं नम्बरमा ब्याटिङ गर्न क्रिजमा गएँ। यसअघि तीन दिवसीय खेलमा राम्रो ब्याटिङ गरेकाले मलाई आफूमाथि विश्वास भने थियो। राम्रो बललाई रोक्ने र अवसर पाउनसाथ रन लिने मेरो योजना थियो। मैले त्यही गर्दै गएँ। मेरो आँखा समय समयमा स्कोर बोर्डमा हुन्थ्यो, टोलीले कति रन पुग्यो भनेर।
एक सय रनसम्म जोड्न सक्यौं भने हामी जित्न सक्छौं जस्तो लागेको थियो, तर त्यहाँसम्म पुग्न सकेनौं। पाली सकिएपछि हाम्रो टेक्निकल एनालिस्ट रमन दाइले तिमीले विश्व रेकर्ड बनायौं भन्नुभयो। उहाँको मजाक गर्ने बानी भएकाले सुरुमा मैले पत्याइनँ। तर, पछि थाहा पाएँ, उहाँले भनेको सही रहेछ।
त्यसपछि यति खुसी भएँ, त्यसलाई शब्दमा व्यक्त गर्न सक्दिनँ। हङकङसँगको खेललाई आईसीसीले पनि मान्यता दिएकाले मेरो कीर्तिमानले पनि मान्यता पाउनु स्वभाविक थियो।
विश्वका होनहार खेलाडीलाई उछिन्दै म शीर्ष स्थानमा पुगें भनेर पत्याउन पनि गाह्रो भयो। फेरि ब्याटिङमा बनाएको कीर्तिमान भएकाले यसले मेरो छुट्टै परिचय पनि स्थापित गराएको छ। यो मेरो व्यक्तिगत सफलता मात्र होइन, सिंगो राष्ट्रले हासिल गरेको उपलब्धि हो।
यसअघि म बलरको रूपमा चिनिएको थिएँ। तर श्रीलंकामा मैले बलिङ र ब्याटिङ दुवैमा राम्रो गर्न सकेँ। बलिङ मेरो जिम्मेवारी हो, ब्याटिङ भने अवसर पाएको बेला खेल्नुपर्छ जस्तो लाग्छ। ब्याटिङमै विश्व कीर्तिमान बनाएकाले अब ममाथि टोलीको विश्वास पनि बढेको छ।
कोचले पनि यसरी नै ब्याटिङ राम्रो ग:यौ भने माथिल्लो क्रममा खेलाउँछु भन्नु भएको छ। हरेक खेलाडीको सपना हुन्छ, राम्रो अलराउन्डर बन्ने। श्रीलंका भ्रमणले यसका लागि मेरो आत्मविश्वास बढाएको छ। साँच्चै भन्ने हो भने श्रीलंका भ्रमणले मेरो परिचय नै फेरिदियो।
(राष्ट्रिय क्रिकेट टोली श्रीलंका भ्रमण सकेर मंगलबार स्वदेश फर्किएको छ। नेपालले त्यहाँ श्रीलंका क्रिकेट बोर्डले दिएको टोलीसँग दुईवटा तीन दिवसीय खेल र हङकङसँग एउटा टीट्वेन्टी अन्तर्राष्ट्रिय खेल्यो।
दुईमध्ये एउटा तीन दिवसीय खेलमा नेपाल पराजित भयो भने एक खेल बराबरीमा सकियो। ती दुबै खेलमा कुल १८ विकेट लिएर नेपालका युवा बलर सोमपाल कामी म्यान अफ दि म्याच बने। उनले हङकङविरुद्धको टीट्वेन्टी खेलमा ब्याटिङमा विश्व कीर्तिमान पनि बनाए।
उनी टीट्वेन्टी क्रिकेटमा १० औं नम्बरमा ब्याटिङ गर्न आएर ४० रन बनाए, जुन विश्व कीर्तिमान हो। श्रीलंका भ्रमण र विश्व कीर्तिमानको विषयमा १८ वर्षीय । एजेन्सी
